HII SIO ELIMU NI VITA........!!SOMA HAPA;

Viongozi wasisitiza wataandamana kushinikiza wenzao warejeshwe ::
Wapanga kuvaa vitambaa vyeusi kuomboleza msima elimu ya juu ::
Kamanda Kova aonya kama hawana kibali wasithubutu, watakiona cha moto
WANAFUNZI 2,000 wa Chuo Kikuu cha Dar es Salaam waliofutiwa udahili, wameapa kutumia kila mbinu kuhakikisha wanajiunga na wenzao chuoni hap oleo, wakitishia kuwa hata ikibidi wafe, basi wapo tayari. Moja ya mbinu walizopanga kuhakikisha wanafunguliwa lango kuu na kuingia chuoni, ni pamoja na kufanya maanadamano makubwa, yatayowalazimisha walinzi kufungua lango la kuingia chuoni.
Ingawa hawakuomba kibali cha polisi, wanafunzi hao wamesema watafanya maandamano hayo kwa amani, huku wakiwa wamevaa vitambaa vyeusi kuashiria msiba wa elimu ya juu Tanzania.

Mbali na maandamano hayo, baadhi ya viongozi wa wa wanafunzi wa chuo hicho kwa kushirikiana na wenzao kutoka Chuo Kikuu cha Sayansi ya Tiba na Afya cha Muhimbili (MUHAS), Umoja wa Vyuo vya Elimu ya Juu vya Umma Tanzania (UVEJUTA), wamesema wapo tayari kumwaga damu. “Kesho (leo) ni siku itakayotumika kumwaga damu za maskini ili kuleta haki katika elimu ya juu Tanzania. Bila haki hakuna amani,” alisema Rais wa Chama cha Wanafunzi wa Chuo Kikuu cha Dar es Salaam (DARUSO), Anthony Machibya, huku akiungwa mkono na viongozi wenzake ambao jana walikutana kupanga mikakati ya kufanikisha maandamano yao leo.

Aliwataka wanafunzi na wananchi walio jirani na chuo hicho kujitokeza kwa wingi kuwaunga mkono pale watakapoandamana kudai haki zao. Wakati wanafunzi hao wakijiandaa kwa maandamano hayo, Jeshi la Polisi Kanda Maalumu ya Dar es Salaam, limesema maandamano hayo ni batili na kuwataka viongozi hao wa wanafunzi wasijidanganye kufanya hivyo. “Sisi hatujiandai kwa ajili ya wanafunzi, sisi tuko tayari muda wote kuzuia uhalifu usitokee.

Kama wamesema wanaandamana wafanye hivyo kama wana kibali, vinginevyo watawajibika kwa kitakachotokea kwenye maandamano hayo,” alionya Kamanda wa Polisi Kanda Maalumu ya Dar es Salaam, Suleiman Kova. Kamanda Kova alisisitiza kuwa nchi lazima iendeshwe kwa kufuata sheria na kwamba hakuna mtu mwenye mamlaka ya kuamua anachotaka kufanya, hata kama kinapingana na sheria za nchi.

Kamanda Kova alisisitiza kuwaonya viongozi hao wa wanafunzi akisema kama hawana kibali, wasithubutu kuandamana kwani madhara ya kufanya hivyo wanayajua. Kutokana na matangazo ya chuo hicho, leo wananchi wa kawaida hawataruhusiwa kukanyaga ardhi ya Chuo Kikuu bila kuwa na kibali maalumu, ingawa wanafunzi wa shule za msingi na sekondari wataruhusiwa kuingia ili mradi tu wavae sare za shule zao. Hata hivyo, hadi jana mchana, mabasi yalikuwa yakiendelea kupitia katika eneo la Chuo Kikuu kama kawaida, tofauti na tangazo la chuo hicho lililotangaza kusitishwa kwa utaratibu wa kawaida wa usafiri hadi Januari 23, 2009.

Uongozi wa chuo hicho ulitangaza kuzifunga barabara zote zinazoingia katika chuo hicho ili kupisha usaili na udahili wa wanafunzi wanaorejea chuoni hapo kuanzia leo. Lango lililopo jirani na Chuo cha Maji lilitajwa kuwa litatumika kwa watu wanaoingia chuoni hapo tu na lile lililopo Chuo Kikuu cha Ardhi kuwa litatumiwa na wanaotoka. Wananchi watakaoathirika zaidi na zoezi hilo la siku tano ni wale wanaoishi maeneo hasa, Changanyikeni, Msewe na jeshini ambao njia zinazokwenda huko kupitia Chuo Kikuu zitafungwa. Godbless Charles, ambaye ni Rais wa Serikali ya Wanafunzi wa MUHAS, alisema damu itakayomwagika ni ya wanyonge na ndiyo itakayotumika kuikomboa elimu ya juu ya kizazi kijacho. Charles ambaye pia ni Mwenyekiti wa UVEJUTA, alisema hawatanyamazishwa kwa milio ya bunduki, bali wataandamana kwa amani na kama ni vurugu zitaanzishwa na polisi walioandaliwa kuwazuia. Katibu wa Mtandao wa wanafunzi wa Vyuo Vikuu Tanzania (TSNP) ambaye pia ni Mbunge wa DARUSO, Owawa Stephen, aliwataka wanafunzi kuvaa nguo nyeusi au kufunga vitambaa vyeusi mikononi kuashiria msiba wa elimu ya juu nchini. “Hatutaingia chuoni kwa nguvu, tunachotaka ni haki yetu ya kudahiliwa, maandamano ni ya amani, wakitumia nguvu watupige tu, watawaua labda wawili na hata 10, lakini hatutasita kuidai haki yetu,” alisema huku akiungwa mkono na viongozi wenzake. Wakati wanafunzi hao wakiendelea na msimamo wao huo, menejimenti ya UDSM nayo imeendelea kushikilia msimamo wake wa kuwazuia wanafunzi walioshindwa kujaza fomu wasikanyage eneo la chuo ama sivyo hatua kali zitachukuliwa dhidi yao.

Baadhi ya wakazi wanaoishi katika maeneo yanayozunguuka chuo hicho, ambao ili wafike ofisini kwao kwa urahisi, ni lazima wakanyage ardhi ya chuo, wameeleza kusikitishwa kwao na adhabu hiyo, ambayo walidai hawastahili. Jumaa Husein, mkazi wa Changanyikeni, alisema hali hiyo itawaathiri kwani watalazimika kuchelewa kazini kwa kuwa watalazimika kupita njia ndefu na mbovu. Madereva wa daladala zinazofanya safari zake Ubungo-Mwenge kupitia Chuo Kikuu, walisema hawajui wataishi vipi na familia zao katika kipindi cha siku hizo tano za kutopita chuoni hapo. Nacho Chama cha NCCR-Mageuzi kimeitaka Serikali kuchukua hatua za haraka kuhakikisha wanafunzi wote wanarejea chuoni na kuendelea na masomo.

Akizungumza na waandishi wa habari jijini Dar es Salaam jana, Katibu Mkuu wa NCCR-Mageuzi, Samuel Ruhuza, alisema Serikali imeshindwa kuweka wazi vipaumbele vya taifa katika kuboresha huduma muhimu za jamii. “NCCR-Mageuzi haichukulii kuwa wanafunzi waliotimiza masharti ya kulipa ada kama walivyoelekezwa kuwa ni kigezo cha kuamini kwamba wazazi waoa wana uwezo wa kulipia gharama za elimu ya juu. “Kwa sababu hii, tunaitaka Serikali iachane mara moja na utumiaji wa sera yake mbovu ya uchangiaji wa gharama za elimu ya juu na mikopo, wale wote wenye uwezo wa kufika Chuo Kikuu waweze kupata kile walichokikusudia,” alisema Ruhuza.